xsMbw5 Z?m4f8k5

ᔮᓐ ᐊᒪᕈᐊᓕᒃ

ᑕᐃᔅᓱᒪᓂ, ᐊᐅᓚᑕᐅᓚᐅᖅᓯᒪᔪᒍᑦ ᒐᕙᒪᒃᑯᓐᓄᑦ... ᐊᓪᓛᒃ ᐃᓱᒪᖅᓱᖅᑐᑦ ᓇᒥᒥᐅᑕᐅᓂᐊᕐᒪᖔᑦᑕ, ᓂᓪᓕᕈᓐᓇᖅᑎᑕᐅᕙᔪᓐᖏᑦᑐᒍᓪᓘᓐᓃᑦ. ᐃᓄᐃᑦ ᐃᓱᒪᖅᓱᓚᐅᖅᓯᒪᓐᖏᑦᑎᐊᖅᑐᑦ ᑕᒪᒃᑯᓂᖓ, ᐊᐱᕆᔭᐅᕙᒐᑎᓪᓗ ᖃᓄᖅ ᐃᓱᒪᒻᒪᖔᑕ. ᐅᖃᐅᔾᔭᐅᑐᐃᓐᓇᑦᑎᐊᖅᑐᑎᒃ.
ᑭᒡᒐᖅᑐᐃᔪᑐᕙᔪᔪᑦ ᒐᕙᒪᒃᑯᑎᒍᑦ ᐃᓄᐃᑦ ᓄᓇᓕᖏᓐᓂ ᐸᓖᓯᒃᑯᑦ, ᐃᓛᓐᓂᑯᓪᓗ ᐋᓐᓂᐊᓲᖅᑐᓂᒃ, ᐃᓕᓴᐃᔨᓂᒃ, ᐊᓪᓚᑦᑎᓂᒃ, ᐱᓗᐊᓐᖑᐊᖅᑐᖅ ᓂᐅᕕᖅᑎᒃᑯᑦ ᐊᖏᔪᖅᑳᖓ, ᑭᒡᒐᖅᑐᐃᕙᔪᔪᖅ ᐅᖃᕆᐊᖅᑐᖅᑎᐅᓪᓗᓂ ᒐᕙᒪᒃᑯᓐᓄᑦ... ᓴᖅᑭᖅᑕᐅᓂᖏᑦ ᖃᓪᓗᓈᑦ ᐃᖅᑲᖅᑐᐃᕕᓕᕆᔨᖏᑦ ᐃᓄᓐᓄᑦ ᓴᖅᑭᖅᑕᐅᑎᒋᔪᐊᓘᓪᓗᑎᒃ ᐅᒡᒋᐊᓇᖅᑐᑎᓪᓗ, ᐱᓗᐊᖅᑐᒥᖃᐃ ᑐᑭᓯᐊᓚᐅᓐᖏᓇᑦᑎᒍ. ᑕᒫᓂᖃᐃ 1960 ᐱᒋᐊᓐᖓᐊᕐᓂᕈᔪᖏᓐᓂ ᖃᐅᔨᕙᓪᓕᐊᓕᓚᐅᖅᑐᒍᑦ ᓴᓐᖏᓂᖃᓐᖏᑦᑎᐊᖅᑐᒍᑦ ᓄᓇᑦᑎᓐᓂ. ᓲᕐᓗ ᑕᒫᓂᒥᐅᑕᐅᒍᓐᓃᖅᑐᒍᑦ ᓄᓇᑦᑎᓐᓂ. ᐃᓅᓂᑦᑎᓐᓄᑦ ᐱᔪᓐᓇᐅᑎᕗᑦ ᓲᔪᕆᔭᐅᓐᖏᑦᑎᐊᒻᒪᕆᓚᐅᖅᑐᖅ ᓯᖁᒥᑦᑕᐅᓪᓗᑎᓪᓗ... ᑕᐃᑲᓂᓗ 1950-ᖏᓐᓂ 1960-ᖏᓐᓄᓪᓗ, ᕿᒥᕐᕈᔭᖅᑐᖅᑐᐊᓘᕙᓚᐅᕐᖓᑕ ᖁᑦᑎᑦᑐᒧ ᐅᖅᓱᐊᓕᓐᓂᒃ ᒑᓯᓂᓪᓗ. ᖃᓄᐃᑦᑐᑐᐃᓐᓈᓗᐃᑦ ᑲᓇᑕᒥ ᑯᐊᐳᕇᓴᐅᔪᑦ ᑕᒪᐅᓐᖓᖃᑦᑕᖅᑐᑎᒃ ᓇᑭᓐᖔᖅᓯᒪᑐᐃᓐᓇᑦᑎᐊᖅᑐᑦ ᕿᒥᕐᕈᓪᓗᑎᒃ ᓇᒥᑐᐃᓐᓇᑦᑎᐊᓪᓚᕆᑯᓗᒃ ᕿᑭᖅᑕᓂᑦ. ...

ᓈᓴᐅᑎᒻᒪᕆᒻᒥ 2, ᔮᓐ ᐅᓂᒃᑳᖃᖅᑐᖅ ᐃᓄᐃᑦ ᖃᓄᐃᓐᓂᕆᓚᐅᖅᓯᒪᔭᖏᓐᓂ 1960-ᖏᓐᓂ, ᐅᐊᑦᑎᔭᐅᓪᑎᓗᒃ ᒐᕙᒪᒃᑯᓐᓄᑦ, ᓂᐅᕕᖅᑏᓪᓗ ᖃᓄᖅ ᐃᓕᖅᑯᓯᖃᖃᑦᑕᓂᕐᒪᖔᑕ ᐊᒻᒪᓗ ᐊᔪᕆᖅᓱᐃᔩᑦ ᖃᓄᖅ ᐃᓄᓐᓂᒃ ᐃᑉᐱᒍᓱᖃᑦᑕᓂᕐᒪᖔᑕ. ᐅᓂᒃᑳᖅᑐᓂᓗ ᐆᑦᑐᕋᖅᑕᐅᓯᒪᓂᖏᓐᓂ ᐊᐅᓪᓛᖅᑕᐅᓪᓗᑎᒃ ᐊᓯᐊᓄᑦ. ᐅᖃᐅᓯᕆᒃᑲᓂᕆᓪᓗᓂᒋᑦ, ᑕᐃᔅᓱᒪᓂ, ᐃᓄᐃᑦ ᐅᖃᕈᓐᓇᕐᕕᖃᖅᑎᑕᐅᔪᓐᖏᒻᒪᑕ ᖃᓪᓗᓈᓪᓗ ᑭᓱᓕᒫᑦᑎᐊᓂᒃ ᐊᐅᓪᓚᑦᑎᓪᓗᑎᒃ: ᖃᓪᓗᓈᑦ ᒪᓕᒐᖏᑦ, ᒐᕙᒪᒃᑯᑦ ᐱᖁᔭᖏᑦ, ᓱᕈᓰᓪᓗ ᐃᓕᓐᓂᐊᕆᐊᖃᕐᓂᖏᑦ ᐃᓄᑦᑎᑐᕆᐊᖃᖅᑎᑕᐅᒐᑎᓪᓗ, ᓄᓇᓪᓗ ᑎᒍᔭᐅᑐᐃᓐᓇᖅᑐᔮᖅᑐᓂ ᐅᖅᓱᓗᓐᓂᐊᖅᑎᒃᑯᓐᓄᑦ ᒐᓯᓕᕆᔨᒃᑯᓄᓪᓗ. ᐅᓂᒃᑳᕆᓪᓗᓂᒋᓪᓗ ᐊᑏᑦ ᓲᕐᓗ ᐃᓄᐃᑦ ᐱᖅᑯᓯᖏᓐᓂ ᓱᓕ ᐅᓪᓗᒥ ᐊᑐᖅᑕᐅᕙᒻᒪᑕ. ᐅᓂᒃᑳᕆᒃᑲᓐᓂᕆᓪᓗᓂᐅᒃ ᐊᐅᓪᓛᖅᑕᐅᓂᒥᓂᖏᑦ ᐊᑖᑕᖃᓗ ᖃᓄᖅ ᐱᓚᐅᖅᓯᒪᒻᒪᖔᖅ ᐅᔾᔨᕈᓱᑦᑎᑦᑎᓪᓗᓂ ᓄᓇᖅᑲᑎᖏᓐᓂ. ᔮᓐ ᐃᖅᑲᐅᒪᒻᒥᔪᖅ ᐱᕙᓪᓕᐊᔪᒃᑰᕈᑕᐅᓚᐅᖅᓯᒪᔪᓂᒃ ᐃᓄᐃᑦ ᖃᓄᐃᓐᓂᖏᓐᓂ. ᐃᖅᑲᐅᒪᔭᒥᓂᓪᓗ ᐅᓂᒃᑳᖅᑐᓂ ᓂᕆᐊᖅᑕᐅᒋᐅᖅᑳᓚᐅᖅᓯᒪᒻᒪᑦ ᐃᓄᒃ ᒪᓕᒐᓕᐅᕐᕕᕐᔪᐊᒧᑦ ᓯᕗᓪᓕᖅᐹᖑᓪᓗᑎᓪᓗ ᒐᕙᒪᒃᑯᓐᓂ ᐊᐃᕙᖃᑎᖃᕈᒪᓪᓗᑎᒃ ᐊᖏᕈᑎᒥᒃ: ᑕᐃᓐᓇ ᓱᓕ ᐅᓪᓗᒥᒧᑦ ᒪᑐᓯᒪᓐᖏᑦᑐᖅ, ᐅᐱᓐᓇᕋᓂ ᒐᕙᒪᒃᑯᑦ ᐊᖏᖅᓯᓯᒪᓐᖏᒻᒪᑕ ᒪᒥᐊᔅᓯᒪᒐᑎᓪᓗ ᐊᐅᓛᖅᑎᕆᓚᐅᖅᓯᒪᓂᖏᓐᓄᑦ. ᔮᓐ ᐅᓂᒃᑳᖃᖅᑐᓂ ᐃᓄᐃᑦ ᓴᓐᖐᓐᓂᕆᓚᐅᖅᓯᒪᔭᖏᓐᓂ 1960-ᖏᓐᓂ, ᐱᖅᑯᓰᑦ ᐊᓯᔾᔨᖅᑕᐅᕙᓪᓕᐊᓪᓗᑎᒃ ᖃᓪᓗᓈᓄᑦ. ᐅᓂᒃᑳᖅᑐᓂᓗ ᓯᕗᓪᓕᖅᐸᒥ ᐃᓕᓐᓂᐊᕐᕕᑦᑖᒥᓂᖓᓐᓂ ᖃᐅᓱᐃᑦᑐᒥ ᐃᓄᐃᓪᓗ ᐃᓅᓱᑦᑐᑦ ᐃᓕᓐᓂᐊᕆᐊᖃᑦᑕᕈᒪᓂᖏᓐᓂ, ᐅᐸᒐᕐᓂᖏᒃᑲᓗᐊᖅᑎᓪᓗᒍ. ᐅᓂᒃᑳᕆᒃᑲᓂᖅᑐᓂᐅᓪᓗᓂ ᐃᓕᓐᓂᐊᕆᐊᕐᓂᕆᓚᐅᖅᓯᒪᔭᖓ ᑰᔾᔪᐊᕌᓗᒻᒧᑦ, ᖃᓄᖅ ᑲᑎᓚᐅᖅᓯᒪᒻᒪᖔᑎᒃ ᑕᐃᑲᓂ ᐅᓂᒃᑳᕆᓪᓗᓂᒋᑦ ᖃᓄᕐᓗ ᐊᑦᑐᐃᓂᖃᑲᒻᒪᓂᕐᒪᖔᑕ ᐃᓚᒌᓐᓄᒃ ᓄᓇᓕᓐᓄᓪᓗ ᐃᓅᖃᑎᒌᓐᓄᑦ. ᐃᖅᑲᐅᒪᒻᒥᔪᖅ ᐅᑎᓚᐅᖅᓯᒪᓂᖓᓂ ᐃᓕᓐᓂᐊᕕᔾᔪᐊᕐᒧᑦ 1970-ᒥ, ᓯᕗᓪᓕᖅᐹᒥᓗ ᐃᖅᑲᓇᐃᔮᕆᓚᐅᖅᓯᒪᔭᖓ ᒐᕙᒪᒃᑯᓐᓄᑦ.