hixo6rbm b+m8z5V

ᔮᓐ ᐊᒪᕈᐊᓕᒃ

ᓴᖅᑭᖅᑕᐅᓂᖓ ᓄᓇᕗᑦ ᐊᓯᔾᔨᖅᓯᒪᒻᒪᕆᓕᖅᑐᖅ ᑲᓇᑕᐅᓪᓕ ᐃᓱᒪᒋᔭᖏᑎᒍᑦ ᓯᓚᑖᓂᓗ ᑲᓇᑕᐅᑉ ᐃᓱᒪᒋᔭᐅᓂᖏᑦ. ᐊᒥᓱᑦ ᓄᓇᓕᕐᔪᐊᑦ ᑲᒪᓪᓚᕆᑉᐸᑦᑐᑦ ᖃᓄᐃᓐᓂᑎᓐᓂ ᑕᒫᓂ. ᐅᖃᐅᓯᕆᖅᑲᒻᒥᔭᕋ ᐅᐊᑦᑎᐊᕈ, ᐱᔾᔪᑎᒋᓗᐊᖅᓯᒪᔭᖏᑦ ᓴᖅᑮᔪᒪᓂᖏᓐᓂ ᓄᓇᕗᒻᒥ ᐃᓄᐃᑦ ᐃᓅᔪᒪᒻᒪᑕ, ᖃᐅᔨᓴᕐᓗᑎᓪᓗ ᐃᖅᑲᓇᐃᔭᕐᓗᑎᓪᓗ ᐃᓄᑦᑎᑐᑐᐊᖅ. ᓄᓇᕗᑦ ᐊᑕᐅᓯᕐᒥᑦ ᐅᖃᐅᓯᕐᒥ ᐊᑐᓕᔾᔮᖏᑦᑐᖅ ᓇᓗᓇᓐᖏᑦᑐᖅ, ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᐃᓐᓇᕐᓂᐊᖅᑐᖅ. ᑕᐃᒪᐃᓪᓗᐊᖃᑎᒃᑲ ᐊᑐᑦᑎᐊᖅᐸᑦᑐᑦ ᓱᓕ ᐅᖃᐅᓯᕐᒥᓂᒃ. ᑕᐃᒪᐃᓕᔪᓐᓇᖏᑦᑐᖓᓕ ᑭᓯᐊᓂ ᓱᕈᓯᕐᓂᑦ. ᐊᑲᕐᕆᓗᐊᖅᐸᓪᓚᐃᓐᖏᑦᑐᑦ ᐃᓄᑦᑎᑐᖓᓐᓂ ᐅᕙᖓᑎᑐᑦ, ᑭᓯᐊᓂᓕ ᐊᓈᓇᖓᑕ ᐅᖃᐅᓯᖓᓐᓂ ᐊᑐᐃᓐᓇᕈᒪᕗᑦ. ᑏᕖ ᐃᑭᑦᑐᒍ ᑐᓴᖅᑕᑐᕙᑦᑐᑦ 99% ᖃᓪᓗᓈᑎᑐᑐᐃᓐᓇᖅ. ᓈᓚᐅᑎᓪᓕ ᐃᑭᒃᑯᕕᐅᒃ ᐱᐅᓂᖅᓴᖅ; ᑕᒫᓂᖃᐃ 50%-ᐸᓘᔪᖅ. ᐸᕐᓇᐅᑎᖏᑦ ᐊᔾᔨᒌᓕᖅᑎᐸᓗᑦᑐᓂᒃ ᐋᖅᑭᔅᓯᓯᒪᔪᑦ ᒐᕙᒪᐅᑉ ᐱᖁᔭᖏᓐᓂ ᑮᓇᐅᔭᓂᓪᓗ ᐊᑐᖅᑕᖏᓐᓂ. ᑮᓇᐅᔭᓂᒃ ᐊᑐᕆᐊᖃᓕᕋᒥ ᐃᓕᓐᓂᐊᖅᑐᓕᕆᓂᕐᒧᑦ, 100%-ᖑᓚᐅᖅᓯᒪᔪᖅ ᖃᓪᓗᓈᑎᑐᑦ. ᐅᐊᑦᑎᐊᕈᑐᖄᓗᒃ ᑭᓯᐊᓂ ᑮᓇᐅᔭᓂᒃ ᐊᑐᓕᑕᐃᓐᓇᓚᐅᖅᓯᒪᔪᑦ ᐃᓄᑦᑎᑐᖓᓂᐊᖅᑐᒧᑦ. ᑕᐃᔭᐅᕙᑦᑐᓂ ᐱᖅᑯᓯᓕᕆᓂᕐᒥᑦ ᐱᖃᓯᐅᔾᔨᓂᖅ.

ᓈᓴᐅᑎᒻᒪᕆᒃ 13, ᔮᓐ ᐅᓂᒃᑳᖃᖅᑐᖅ ᖃᓄᖅ ᐱᒋᐊᓚᐅᖅᓯᒪᒻᒪᖔᖅ ᓄᓇᕗᑦ ᐊᓯᔾᔨᖅᓯᒪᓕᕐᖓᑦ ᑕᑯᓐᓇᖅᑕᐅᓂᖏᓐᓂ ᑲᓇᑕᒥᐅᑕᓕᒫᓄᑦ ᓯᓚᕐᔪᐊᒥᓗ. ᐅᖃᖅᑐᓂᓗ ᑕᑯᓐᓇᖅᑕᐅᓂᖏᑦ ᑲᓇᑕᒥ ᐊᓯᔾᔨᖅᓯᒪᓕᕐᖓᑦ ᒪᕐᕉᓐᓄᒃ ᐱᒋᐊᖅᑕᐅᓯᒪᓪᓗᓂ ᑕᒪᓐᓇ ᐊᓯᔾᔨᖅᓯᒪᑦᑎᐊᖅᑐᓂᒃ ᓄᓇᖃᖅᑳᖅᑐᒥᓂᕐᓂᑦ. ᐅᖃᐅᓯᖃᒃᑲᓐᓂᕆᓪᓗᓂᓗ ᑐᕌᒐᖏᓐᓂ ᓴᖅᑭᕈᒪᔭᖏᓐᓂ ᓄᓇᕗᑦ, ᐱᓗᐊᖅᑐᒥᑦ ᒐᕙᒪᒃᑯᑦ ᐊᐅᓚᒋᐊᖃᕐᓂᖏᓐᓂ ᐃᓄᑦᑎᑐᑦ, ᐊᒥᓲᓂᖅᓴᐅᒻᒪᑕ ᐃᓄᑦᑎᑐᕈᓐᓇᖅᑐ, ᖃᓄᐃᓘᕆᐊᖃᕐᓂᐊᕐᓂᖏᓐᓂᓪᓗ ᑕᒪᔅᓱᒥᖓ ᑲᔪᓯᑎᑦᑎᒐᓱᐊᕐᓂᐊᕈᑎᒃ. ᐅᖃᐅᓯᖃᖅᑐᓂᓗ ᐱᒻᒪᕆᐅᓂᖓᓐᓂ ᖃᓪᓗᓈᑎᑐᕈᓐᓇᕐᓂᖅ ᓄᓇᕗᑦ ᒐᕙᒪᒃᑯᖏᓐᓂ, ᓇᓗᓇᐃᖅᓯᓪᓗᓂᓗ ᑭᒡᒐᖅᑐᖅᑕᐅᖏᓗᐊᕐᖓᑕ ᐃᓄᓐᓄᑦ ᐃᖅᑲᓇᐃᔭᕐᕕᓐᓂᒃ ᓄᓇᕗᒻᒥ. ᐅᖃᐅᓯᖃᖅᑐᓂᓗ ᓇᒦᓐᓂᖓᓐᓂ ᐃᓄᑦᑎᑐᑦ ᐊᔅᓱᕉᑕᐅᕙᑦᑐᓂᓗ ᐃᓕᓐᓂᐊᑎᑦᑎᓇᓱᐊᕐᓂᖏᓐᓂ ᐸᕐᓇᓯᒪᑦᑎᐊᓐᖏᓗᐊᕐᓂᖏᓐᓄᑦ ᐱᔾᔪᑎᖃᕐᒥᔪᖅ ᐊᔾᔨᒌᓕᖅᑎᑕᐅᓗᐊᕐᓂᖏᓐᓂ ᐊᕐᕌᒍᒐᓛᓗᓐᓄᓪᓗ ᑕᐃᒪᐃᔅᓯᒪᓪᓗᓂ, ᐃᓕᓴᐃᔨᔅᓴᖃᑦᑎᐊᓐᖏᓗᐊᕐᓂᖏᓐᓄᑦ. ᐅᓂᒃᑳᖃᖅᑐᓂᓗ ᐱᐅᓂᖅᐹᑦ ᐱᐅᓐᖏᓂᖅᐹᖑᒐᔭᖅᑐᓪᓗ ᓯᕗᓂᔅᓴᖓᓐᓂ ᓄᓇᕗᑦ, ᐱᒻᒪᕆᐅᓂᕋᐃᓪᓗᓂᓗ ᓄᓇᓖᑦ ᐃᖏᕐᕋᑦᑎᐊᕆᐊᖃᕐᓂᖏᓐᓂ. ᖁᕕᐊᑦᑐᖅ ᐸᐃᑉᐹᖅᑖᕈᓐᓇᓂᖅᓴᐅᓕᕐᖓᑕ ᐃᓄᐃᑦ ᐊᑲᐅᓐᖏᓕᐅᕈᑕᐅᔪᑦ ᐋᖅᑭᔾᔪᑎᒋᔪᓐᓇᕋᔭᖅᑕᖏᓐᓂ, ᓲᕐᓗ ᐃᒥᐊᓗᓗᐊᖃᑦᑕᕐᓂᖅ, ᔭᒐᑉᐸᓪᓕᐊᒻᒪᑦ. ᐅᖃᐅᓯᖃᖅᑐᓂᓗ ᐱᓕᕆᐊᕆᔭᕆᐊᓕᖏᓐᓂ ᐊᓪᓚᑦᑏᑦ ᑲᑎᖅᓱᐃᒋᐊᖃᕐᓂᖏᓐᓂ ᓯᕗᓂᑦᑎᓐᓂ ᓄᓇᕗᒻᒥ, ᐆᑦᑐᑎᖃᖅᑐᓂᓗ ᐃᓚᖏᓐᓂ ᓄᓇᓕᓐᓂᑦ ᑕᑯᔅᓴᐅᓗᐊᖅᑐᓂᒃ. ᐱᒻᒪᕆᐅᓂᕋᐃᓪᓗᓂᓗ ᐊᓯᕙᕐᓂᕐᒥᑦ ᐃᖃᓗᒐᓱᐊᕐᓂᒥᓪᓗ ᑕᒪᓐᓇ ᑲᔪᓰᓐᓇᕆᐊᖃᖅᑐᖅ ᓄᓇᕗᒻᒥ ᐃᓱᒫᓘᑕᐅᔪᓪᓗ ᑕᒪᔅᓱᒧᖓ, ᐱᓗᐊᖅᑐᒥᑦ ᓯᓚ ᐅᖅᑰᓯᕙᓪᓕᐊᓕᕐᓂᖓᓐᓂ ᑭᓱᑐᐃᓐᓇᓪᓗ ᐊᑭᑦᑐᐸᓪᓕᐊᓗᑎᒃ. ᑭᖑᓪᓕᖅᐹᒥᓕ ᐅᖃᐅᓯᖃᖅᑐᓂ ᓄᓇᕗᑦ ᑎᒍᓯᒍᓐᓇᑐᐃᓐᓇᕆᐊᖃᕐᖓᑦ ᐊᕕᑦᑐᖅᓯᒪᔪᓂᒃ ᑲᓇᑕᒥ ᐱᔪᓐᓇᐅᑎᒥᒃ.